एचआइभी संक्रमित भन्छन् : आफू पनि बचौँ र अरुलाई पनि बचाऔँ

पाल्पा, १५ मंसिर ।
रिब्दीकोट गाउँपालिका–७ का ४० वर्षीय लक्ष्मी कुँवर एचआइभी संक्रमित हुनुहुन्छ । ‘आफू बचाैँ र अरुलाई पनि बचाऔँ’ भन्ने अभियानमा उहाँ जुट्नुभएको छ ।

आफू एचआइभी संक्रमित भएको कुरा उहाँले समाजमा खुलेरै भन्दै हिँडेका छन् । उहाँ आफूमात्र नभई अरुलाई पनि बाहिर ल्याउने अभियानमा प्रतिबद्ध सहयोग समूह गठन गरेर समाजमा विभिन्न जनचेतनामूलक काममा सक्रियरुपमा लागिरहनुभएको छ ।

आफूले २०५१ सालमा एचआइभी संक्रमित भएको थाहा पाए तर चार वर्ष जति समाजको डरले बाहिर खुल्न सकिएन् । समाजको कुनै प्रवाह नगरी उहाँले २०५४ देखि आफू एचआईभी संक्रमित भएको भन्दै विभिन्न सामाजिक कार्यमा लाग्नुभएको छ ।

“२०५१ मा वैवाहिक जीवनमा बाँधिए, त्यति बेला श्रीमान् एचआइभी संक्रमित हुनुहुँदो रहेछ, उहाँबाटै मलाई पनि स¥यो”कुँवरले भनिन्– “श्रीमान्ले नियमित औषधि सेवन नगर्दा उहाँको अकालमै मृत्युभयो ।” “श्रीमान्को मृत्युपछि केही समय रोग लुकाएर राखे, समाजका केही व्यक्तिले नराम्रो व्यवहार गर्न थालेपछि म आफैँ बाहिर खुलैरै हिँड्न थाले, अहिले नराम्रो सुन्नु परेको छैन” कुँवर बताउनुहुन्छ ।

उहाँले जिल्लाभित्र रहेका एचआइभी संक्रमितलाई साथमा लिएर समाजमा सकारात्मक सन्देश प्रवाह गर्दै आउनुभएको छ । “आफूमा एचआइभी छ भनेर समाजसँग डराएर लुकेर बस्ने होइन, समाजमा खुलेर हिँडियो भने अरुसरह नै बाँच्न सकिन्छ” उहाँको भनाइ छ ।

एचआइभी संक्रमित भए पनि रोगदेखि डराउनु नपर्ने र नियमित औषधि सेवन गरे लामो समयसम्म बाँच्न सकिने भएपछि उहाँमात्र होइन, उहाँजस्तै धेरै संक्रमितले अहिले समाजमा खुलेरै बाहिर आउन थालेका छन् ।

रामपुरकी ४१ वर्षीय एचआइभी संक्रमित लक्ष्मी भण्डारी पनि चार वर्ष अघिदेखि समाजमा खुलेरै हिँड्नुभएको छ । उहाँलाई एचआइभी लागेको अहिले ११ वर्ष भयो तर लामो समयसम्म उहाँ आफैँ रोगदेखि भित्रभित्रै लड्नुभयो पछि विस्तारै बाहिर आएको बताउनुहुन्छ । उहाँ भन्नुहुन्छ, “शुरुमा डर र लाजले बाहिर आउन समस्या भयो, अहिले त गाउँघरमा सबैसँग मेलापातलगायतका विभिन्न कामकाजमा खुलैरै हिँड्छु, आफूलाई एचआइभी संक्रमित हुँ भन्ने अनुभव नै हुँदैन” ।

आर्थिक वर्ष २०७३÷०७४ मा जिल्लामा ३१२ एचआइभी संक्रमित रहेका छन् । अघिल्लो वर्षको तुलनामा १७ जना एचआइभी संक्रमित थपिएका हुन् । आव ०७२÷०७३ मा २९५ जना एचआइभी संक्रमित रहेको जिल्ला जनस्वास्थ्य कार्यालयका सूचना अधिकारी माधव ज्ञवालीले जानकारी दिनुभयो । गाउँगाउँमा जनचेतनामूलक कार्यक्रम सञ्चालन गरिन थालेपछि पछिल्लो समय उनीहरु खुल्न थालेको उहाँले बताउनुभयो ।

भित्रभित्रै समाजको डर र लाजका कारण रोग लुकाएर बसिरहेका एचआइभी संक्रमित अहिले स्वास्थ्य संस्थामा नै परामर्श तथा उपचारका लागि जाने क्रम बढ्न थालेको ज्ञवालीको भनाइ छ । संक्रमितमध्ये ८७ प्रतिशतले जिल्लाको मिसन अस्पतालबाट एआरटी सेवा लिदैँ आएको छ । जिल्लामा रहेका ३१२ एचआइभी संक्रमितमध्ये अहिलेसम्म ४१ जनाले समाजमा खुलैर हिँड्ने गर्छन् । रासस